domingo, 24 de marzo de 2013

27 DE MARZO, DÍA DO TEATRO


O grupo de teatro de 3º de ESO representou dúas adaptacións de “Ramón” de Sergi Belbel realizadas por Begoña Muñoz Saá.
Nestas escenas breves unha múltiple personaxe feminina establece un diálogo coa parella masculina. Cinco mulleres, cansas do comportamento machista das súas parellas masculinas, rebélanse e deciden abandonalos. O bombardeo de reproches está salpicado de humor  e ironía. 

Acompañamos as fotos coa escena de cada representación que corresponde ao momento máis álxido.
 
MOZAS
[...]
RAMÓN 1: Non aturo máis, de verdade.
RAMÓN 2: Es ti a que non me deixas demostrarche canto te quero.
RAMÓN 3: Mira, interrompiches as miñas demostracións amorosas para dicir... parvadas, perdoa pero si, parvadas, e a verdade, xa non sei que máis facer.
MULLER 4: Facer? Quen che pide que fagas máis, Ramón?
MULLER 1: O que che pido é que fagas menos, Ramón.
MULLER 2: Non fai falla que fagas tanto, Ramón.
MULLER 3: O que quero
MULLER 4: non é que fagas, o que quero é que non fagas.
MULLER 1: Porque, pasas as horas
MULLER 4: sobándome, Ramón,
MULLER 2: os días e as semanas
MULLER 4: sobándome, Ramón,
MULLER 3: os meses e meses
MULLER 4: sobándome, Ramón. E o único que fas, Ramón é…
MULLER 1 E MULLER 2: É sobarme!
MULLER 4: Só tes unha idea na cabeza. En realidade, non tes cabeza.
MULLER 3: Só che funciona unha parte do corpo.
MULLER 2: E eu o que preciso é
MULLER 1: un home completo, entendes?
MULLER 2: Que teña de todo, entendes?
MULLER 3: Que teña de todo e tamén cabeza, entendes?
MULLER 4: E ti... non... E dubido moito que ti...
[...]
ADULTAS
[...]
MULLER 4: Dicirme?
MULLER 5: Quen che pide que fales, Ramón?
MULLER 1: É que non tes por que dicirme nada.
MULLER 2: Non fai falla que me digas nada.
MULLER 3: O que quero
MULLER 4: non é que me digas algo,
MULLER 5: o que quero é que fagas.
TODAS: que fagas algo, Ramón.
MULLER 1: Porque, as camas
MULLER 4: desfanse, Ramón,
MULLER 2: os pratos e a louza toda
MULLER 4: ensúciase, Ramón,
MULLER 3: o chan da casa
MULLER 4: énchese de merda, Ramón.
MULLER 5: e ti todos os días comes, Ramón.
MULLER 1 E MULLER 2: Comes!
TODAS: E non fas nada, Ramón.
MULLER 5: Non recolles a mesa,
MULLER 4: Non baixas o lixo.
MULLER 3: Non limpas o váter.
MULLER 2: E eu o que preciso é
MULLER 1: un home que cociñe
MULLER 2: que limpe os cristais
MULLER 3: que pase o aspirador.
[...]




xoves, 21 de marzo de 2013

DÍA DA ÁRBORE E DA POESÍA



Hoxe, día da árbore, da poesía e da eliminación da discriminación racial lembramos a Wangari Maathai, a primeira muller Doutora de África oriental e premio Nobel da Paz. Nacida en Kenia, creou un movemento ecoloxista en 1977 ao que chamou “Movemento Cinto Verde”, convencida de que a ecoloxía era e é un camiño rigoroso e firme para alcanzar a paz. 

Lembramos algunhas palabras dela.

"Ata que non caves un buraco, plantes unha árbore, a regues e a fagas sobrevivir, non fixeches nada. Só estás falando."

"A paz na Terra depende da nosa capacidade para asegurar o medio ambiente: a degradación ambiental e a pobreza van xuntas."

"Unha árbore ten raíces no chan e ramas que rozan o ceo, e recórdanos que para prosperar temos que saber de onde vimos."

“Non podemos quedar sentadas a ver como morren de fame os nosos fillos. Se non tedes leña, plantade árbores.”

xoves, 7 de marzo de 2013

8 DE MARZO

Mañá é 8 de marzo, deixamos aquí todas as nosas actividades planificadas para o día e para o mes.
O equipo da biblioteca está comprometido co tema da igualdade e propón traballalo todo o ano integrado no currículo das diferentes materias, así como en titoría.
Actividades do ano pasado.




Vídeos Nena de 5 anos contra a publicidade sexista
O maltrato “sutil”, derivada da tiranía da beleza

Media Literacy Project

domingo, 3 de marzo de 2013

4 LECTORES ELECTRÓNICOS PARA A BIBLIOTECA



O 20 de febreiro a nosa biblioteca recibiu catro lectores electrónicos o 20 de febreiro grazas a un proxecto piloto, E-LBE, integrado no PLAN LÍA de bibliotecas escolares da Consellería de Cultura, Educación e Ordenación Universitaria.

O equipo da biblioteca ao completo (Ana-profesora de Plástica-, Maite-profesora de Física e Química-, Natalia-profesora de Economía- e Carmen-profesora de Lingua e Literatura)  posa cos lectores. Tamén alumnos do PCPI, que estaban lendo na biblioteca, se sumaron á sesión de fotos. 

O equipo mantén o compromiso coa lectura e está encantado de dispor de máis recursos que ofrecer ao alumnado para facilitarlle o acceso á lectura en todo tipo de soportes.

Máis información na páxina de bibliotecas escolares